УКМК жасоолдору Жалал-Абад ОИИБ орун басарын, Сокулук РИИБнин үч оперин, Ленин РИИБнин тергөөчүсүн камакка алышты. Жакынкы эле күндөрдө. “Жыргаганыман жылкычы болуптурмунбу?” деген икая бар. Анын сыңарындай, милициядагы намыстуу оперлер копшолушуп, УКМКнын кызматкерлерин кармоого далалат кылышууда. Бирок буларга уруксат бербей атпайбы, колу-буттарын тушап салышып... Чыныгы оперлер күйүп атышат да, “бизге мүмкүнчүлүк берсе, мажорлорду быркыратып салабыз” дешип. 

     УКМК төрагасы Жумгалбек Шабданбеков эски жолду улантып, камакка алууну күчөттү. Келечекте милициянын “таш булчуң” оперлеринин колуна түшүп калсачы? Алар ызырынып жатышат...

     Негизинен ГУУРдун ишмердигине оң баа берсек болот. Себеби, а жерде “карт бөрү” Мыктыбек Болушевдин орун басар катары үзүрлүү иштеп атканы белгилүү. Тажрыйбасына жараша көп жылдан бери ээрден түшпөй келатат. Каарманыбыз табиятынан түз жүргөнү, адамгерчилиги менен башкалардан айырмаланып, туруктуу адамдардын арасынан аброй тапканын танбайбыз. Балпайып сый үстүндө жүрө берсин!

     Эми мынча болду, катуу келген маалыматты кебезге орогондой узатып коёлук. “Кой аксагы менен миң” дегендей, коңгуроо кагалы. ГУУРдун ичинде көлдүктөр менен таластыктардын ажырымы кетип баратабы? Тымызын ыркырашып, бирок ачыкка чыга алышпай күбүр-шыбырдын деңгээлинде жүрүшкөнү кандай? Былчылдаша мушташып кетишпегей эле... “Шамал болбосо чөптүн башы кыймылдабайт” демекчи, бул аңызга алдыртан маани берели да...

     Бирок Мыктыбек Болушев көлдүктөргө, таластыктарга да кошулбайт экен. Ал – Кыргызстандык! 

     Президент Садыр Жапаров Ош облусун бир апта кыдырып, эл менен жолугушпадыбы. Мындай саамалык ириде өз жемишин берсе керек. Аймактагы кырдаалга анализ жасап, коомчулуктун сунуш, арыз-муңун угуу маанилүү эмеспи.  Эң олуттуусу, жергиликтүү аткаминерлердин купулга толбогону тар чөйрөдө күйдүрдүбү?   

     Мисалы, Ош ОИИБ начальниги Нурланбек Бурканов өздүк курамды башкарууда уюштуруу иштерин талапка ылайык аткара албаганы, бир катар кемчиликтерди кетиргени менен сындалып, катуу сөгүш алганы кабарланды. Ошто болуп келген ИИМдин 1-орун басары Адылбек Бийбосунов аймактагы милициянын кемчиликтерине кейигенин эшиттик. Адатта адилеттүү баа берүү шарт. Мугалим Адылбек мырзанын жөн жерден ачуусу келбесе керек, Буркановдун ишмердигине “2” деген баа койдубу? 

      Соңку убакта Камчыбек Ташиевге каршы чабуул басаңдап баратат. Элдешүү расмиси бекер жерден чыкпаса керек. “Кемпирабадчыларга” да кожоюндарынан “тийишпегиле” деген буйрук келгени каңкууланды. Акүйгө караштуу айрым блогерлер да тизгинделүүдө.

     Мындай шартта Камчыбек Ташиевди “туздаган” жалгыз гана Адилет Айтикеев калганы маалым. Ал дагы бийлик тараптан соккон желди сездиби, айтор, жакында Америкага кеткени калыптыр. “Урдум саясатыңарды!” деп түңүлгөн кербезиби? Эске салсак, Ташиев кызматтан кеткенден бери Адилеттей эч ким тобокелге барып, маалыматтык согуш жүргүзгөн эмес. Эмгеги бааланбай калдыбы?     

     А генералга атака коюп, канчалык жарга такаган сайын опурталдуу жагдай түзүлө баштаганбы? Негизи Ташиевге каршы күрөшүү саясый кырдаалдын туруксуздугуна алып келеби? Түпкүлүгүндө кандай мандем бар? Бул багытта саресеп салган талдоочулар деле жок окшойт...

     Академик Абдыганы Эркебаев баш болгон аксакалдар Садыр Жапаров менен Камчыбек Ташиевди элдештирүүгө демилге көтөрүштүбү? Бул таризде саясый элитада талкуулар жанданууда. Ошондо “Кыргызнефтегаз” мекемесиндеги Шайырбек Ташиевге байланыштуу иш гана каралып, убакыттын ыңгайына жараша чекит коюлабы? Андан ары “чукушмай” токтоп, достошуу демилгеси жүзөгө ашабы? Эски достордун ортосуна бүлүк салгандар эмне болот? Кыскасы, далай соболдордун түйүндөрү чечилбей турган кез...

     Жол кыймылынын коопсуздугун камсыздоо башкы башкармалыгынын начальниги Азенбек Козукеевге өздүк курамынан каршы алты арыз жазылганы кабарланды. Алар ИИМге, прокуратурага кайрылып атышканын эшиттик. Негизинен Азенбек Козукеев этиканы сактабаганы, кол алдындагыларды сөгүп-сакканы, куугунтуктаганы жана каржылык маселелер боюнча айыпталабы? Иликтөө, тергөө органдары начальникти коргошобу, же катардагы кызматкерлердин укуктарын сакташабы? Жакында көрө жатмакчыбыз. Айтор, аталган системанын ашмалтайы чыгып, кризиске батып калса, мындай абалдан кантип чыгуу керек? Албетте, тажрыйбалуу, адилеттүү жетекчинин келишине өздүк курам суусап турганы каңкууланды. 

      Эртең саат 11.00дө Бишкектеги Anel Grand тойканасында “кемпирабадчылар” түлөө өткөрүшөт. Чакырылгандар – саясый тилектештер, адвокаттар, журналисттер ж.б. Алар бир топ убакытка дейре түрмөдө жатышты, кыйналышты, акыры акталуу процессине да жетишишти. Жамандык ошону менен чыгып кетсин! 

     Бирок коомчулукту таңгалдырган бир маселе бар. “Кемпирабадчылар” ошончо азапты көрүшүп, күнөөлөрү далилденбей акталышкан соң, эмне үчүн тебеленген укуктарын коргобой калышты? Бул суроо баарын ойлондурууда. Айрымдары миллиондогон кредиттерди алышса, кээ бирлери бийликтин пиар кампаниясын жүргүзүшүп, камыр-жумур болуп кетишкени кандай? Кечээги баалуулуктар, принциптер кандай кызыкчылыктардын негизинде өзгөрүп кетти? 

      “Кемпирабадчылардын” анабашчысы Азимбек Бекназаров бийликтин камчысын чаап, Камчыбек Ташиевди сындап, бир топ акаарат келтирген эле. Көп өтпөй генералдын тарапташтары соцтармактан жооп кайтарышып, массалык түрдө каршылык көрсөтүп коюшту. “Суу кечпей калды” деп коёт го, ошондой болду. 

     Айтмакчы, түлөөгө президенттин кеңешчиси Жаныбек Кубандыков да келмекчи. Бул “кемпирабадчылардын” кураторубу? 

     Кыскасы, түлөө кабыл болсун! Өткөн саясаттан сабак алуу керек. Келечек муунга көмүскөдөгү тар кызыкчылыктарды эмес, үлгү ала турган өрнөктү, туруктуулукту көрсөтүп кетүүнү ойлосок...

     Бизге жеткен маалымат боюнча, ЖАМК төрагасы Чыңгыз Кожошевдин кызматтан алынары кабарланды. Жумушундагы катачылыктар, бир катар орой кемчиликтерди кетиргени талданып атыптыр. Эске салсак, былтыр президент тарабынан Чыңгыз Кожошевге сөгүш берилген. Дал ушул кадр ЖАМКга төрага болуп келгени түрмөлөрдөн ондогон адамдардын сөөгү чыкканбы? Атайын аскерлерге сабатып, ошонун кесепети тийди беле? Бул соболдор ачык бойдон калууда. 

    Жалал-Абад ОИИБ начальниги Марлис Асановдун орун басары 170 миң сом пара талап кылууга шектелип, УКМК тарабынан кармалдыбы? Тергөөнүн жүрүшүнө карай көп маалыматтар чыгышы мүмкүн. Бакандай орун басары оор кылмышка айыпталып атса, Марлис Асанов да кызматынан кетеби? Моралдык жоопкерчилиги бар эмеспи. 

     Эске салсак, Марлис Асанов Чүй ОИИБнин орун басары кезинде Жайыл РИИБнин ичинен Бурулай бычакталып өлтүрүлүп, ошонун айынан кызматынан алынган. Эл аралык деңгээлде чуулган чыккан эле. Тилекке каршы, “таанышың болсо танкасың” дегендей, кызматтык карьерасын жасап жүргөнүн кара. 

      Ошентип, Ленин округунан мандат ала турган Чыңгыз Айдарбеков өз арызы менен баш тартып, “жайдак” калды. Кылмыш козголуп, үйүнө тинтүү жасалып жатып, акыры жоошуп берди окшойт. Бул көрүнүшкө келечекте дагы баа берилсе керек. А түпкүрүндө Айдарбеков депутат болуп алса, анан күзүндө президенттик шайлоого аттанат беле? Күбүр-шыбырлар бекеринен чыкпаса керек...

     Акыры Ленин округунан кийинки кезекте турган Мирлан Жээнчороев депутаттык креслого жетти. Дал ушул жигитке мандат берүү үчүн Чыңгыз Айдарбеков “жыга чабылдыбы”? Көшөгөнүн артында оюндар жүрүп жатканы каңкууланган. Мирлан Жээнчороев ажонун кеңешчиси Жаныбек Кубандыковдун штабына каттап, колдоо издеп, акыры максатын ишке ашырдыбы? “Шамал жүрбөсө чөптүн башы кыймылдабайт” дейт. Ансыңарындай, Мирлан Жээнчороев өзүнөн күчтүү атаандашы Чыңгыз Айдарбековго көмүскөдөн кандай ыкмаларды колдонду? Жаныбек Кубандыковдун сүрөгөнү менен мандат алдыбы? Айтор, соболдор арбын.